കോട്ടയം ഭദ്രാസന മെത്രാപ്പോലീത്തായായിരുന്ന കാലംചെയ്ത അഭി. ഗീവര്‍ഗീസ് മാര്‍ ഈവാനിയോസ് മെത്രാപ്പോലീത്താ ദൈവത്താല്‍ തിരഞ്ഞെടുക്കപ്പെട്ട മഹാപുരോഹിതനാണെന്ന് പരിശുദ്ധ ബസേലിയോസ് മാര്‍ത്തോമ്മാ പൗലോസ് ദ്വിതീയന്‍ കാതോലിക്കാ ബാവാ അനുസ്മരിച്ചു. വ്യത്യസ്തമായ വിശ്വാസ സാഹചര്യങ്ങളില്‍ ജനിച്ചിട്ടും മലങ്കര സഭയുടെ വിശ്വാസത്തിലും ജീവിതത്തിലും അടിയുറച്ച് നില്‍ക്കുവാനും  അദ്ദേഹത്തിന് സാധിച്ചു. ഇംഗ്ലണ്ട് പോലുള്ള പാശ്ചാത്യ രാജ്യത്ത് പഠനത്തിനായി ജീവിക്കുന്ന കാലത്തുപോലും  സസ്യാഹാരവും നോമ്പും വ്രതനിഷ്ടമായ ജീവിതവുമൊക്കെ കാത്തുപരിരക്ഷിച്ചതിലൂടെ ഒരു യോഗീശ്വരനെയാണ് അദ്ദേഹത്തിലൂടെ വെളിവായതെന്ന് പരിശുദ്ധ ബാവാ പറഞ്ഞു. മാരകമായ രോഗങ്ങള്‍ വന്നിട്ടും അടിയുറച്ച ദൈവവിശ്വാസത്തിലൂടെ ഇതിനെയെല്ലാം അദ്ദേഹം അതിജീവിച്ചു എന്ന് പരിശുദ്ധ ബാവാ കൂട്ടിചേര്‍ത്തു.

പെരുന്നാള്‍ ശുശ്രൂഷകള്‍ക്ക് പരിശുദ്ധ ബസേലിയോസ് മര്‍ത്തോമ്മാ പൗലോസ് ദ്വിതീയന്‍ കാതോലിക്കാ ബാവാ മുഖ്യകാര്‍മ്മികത്വം വഹിച്ചു. അഭി. ഡോ. മാത്യൂസ് മാര്‍ സേവേറിയോസ് മെത്രാപ്പോലീത്താ, അഭി. ഡോ. ഗബ്രിയേല്‍ മാര്‍ ഗ്രീഗോറിയോസ് മെത്രാപ്പോലീത്താ, അഭി. ഡോ. യൂഹാനോന്‍ മാര്‍ ക്രിസോസ്റ്റമോസ് മെത്രാപ്പോലീത്താ ഡോ. ജോസഫ് മാര്‍ ദിവന്നാസ്യോസ് മെത്രാപ്പോലീത്താ, എന്നിവര്‍ സഹകാര്‍മ്മികത്വം വഹിച്ചു. 12-ാം  തീയതി ഞായറാഴ്ച്ച വൈകിട്ട് സന്ധ്യാനമസക്കാരവും തുടര്‍ന്ന് പ്രദിക്ഷിണം ധൂപപ്രാര്‍ത്ഥന ആശിര്‍വാദം നേര്‍ച്ചവിളമ്പ് എന്നിവ നടന്നു. 13-ാം തീയതി രാവിലെ പരിശുദ്ധ ബസേലിയോസ് മാര്‍ത്തോമ്മാ പൗലോസ് ദ്വിതീയന്‍ കാതോലിക്കാ ബാവായുടെ മുഖ്യകാര്‍മ്മികത്വത്തില്‍ വി. കുര്‍ബ്ബാനയും തുടര്‍ന്ന് കബറിങ്കല്‍ ധൂപപ്രാര്‍ത്ഥന , ആശിര്‍വാദം, നേര്‍ച്ചവിളമ്പ് എന്നിവയോടെ പെരുന്നാള്‍ സമാപിച്ചു.വിശ്വാസ വിപരീതങ്ങള്‍ക്കെതിരെ  ആഞ്ഞടിച്ച കൊടുങ്കാറ്റുപോലെയുള്ള പ്രവര്‍ത്തനമായിരുന്നെന്ന് അഭി. ഡോ. മാത്യുസ് മാര്‍ സേവേറിയോസ് മെത്രാപ്പോലീത്താ കുര്‍ബ്ബാന മദ്ധ്യേ നടത്തിയ പ്രസംഗത്തില്‍ പറഞ്ഞു.